კონფიდენციალურობის პოლიტიკა

1. ვინ ვართ

Canguru არის ვეტერინარული კლინიკების მართვის პროგრამა და აპლიკაცია ცხოველების პატრონებისთვის (my.canguru.ge). კლინიკებს, რომლებიც Canguru-ს იყენებენ, ამ პოლიტიკაში „Canguru-ს კლინიკებს“ ვუწოდებთ.

თქვენს ანგარიშსა და აპლიკაციაში შეყვანილ მონაცემებზე პასუხისმგებელია Canguru. თითოეული კლინიკა თავად არის პასუხისმგებელი იმ სამედიცინო ჩანაწერებზე, რომლებსაც თქვენი ცხოველის მკურნალობისას აკეთებს — Canguru ამ ჩანაწერებს კლინიკის სახელით ინახავს და ამუშავებს.

2. რა მონაცემებს ვამუშავებთ

მხოლოდ იმას, რაც სერვისისთვის აუცილებელია:

• თქვენ შესახებ: სახელი და გვარი, მომხმარებლის სახელი, ელფოსტა, მობილურის ნომერი, დამატებითი ტელეფონი, ქალაქი და ენა — რასაც თავად შეიყვანთ ან დაადასტურებთ.
• შესვლისას: თქვენი პაროლი — მხოლოდ დაშიფრული (ჰეშირებული) სახით, ისე რომ მისი წაკითხვა ჩვენც არ შეგვიძლია; თუ Google-ით ან Apple-ით შედიხართ, ამ ანგარიშის იდენტიფიკატორი და ელფოსტა.
• თქვენი ცხოველების შესახებ: სახელი, სახეობა, ჯიში, სქესი, დაბადების თარიღი, ფერი, მიკროჩიპის ნომერი, ალერგიები, წონა და შენიშვნები, რომლებსაც თქვენ დაამატებთ.
• კლინიკების ჩანაწერები: როცა თქვენს ანგარიშს დაუკავშირებთ ჩანაწერებს, რომლებიც კლინიკებს უკვე აქვთ, აპლიკაციაში ნახავთ, რაც მათ თქვენს ცხოველებზე გამოაქვეყნეს — ვიზიტები, აცრები, დანიშნულებები, ანალიზის პასუხები და წონა.
• შეტყობინებები: რა გამოგიგზავნათ კლინიკამ ან Canguru-მ და როდის.
• ტექნიკური: IP მისამართი და ერთჯერადი კოდები (მხოლოდ დაშიფრული სახით) — ბოროტად გამოყენების შესაზღუდად. კოდები 30 დღეში იშლება.

3. როგორ ვიცავთ თქვენს და თქვენი ცხოველების მონაცემებს

უსაფრთხოება ამ სისტემის საფუძველია და არა დამატება:

• ყველა კავშირი დაშიფრულია (HTTPS). თქვენი სესია ინახება დაცულ ქუქიში, რომელსაც ვებგვერდის სკრიპტები ვერ კითხულობენ.
• პაროლები ჰეშირებული ინახება და მათი აღდგენა შეუძლებელია; ხუთი არასწორი ცდის შემდეგ შესვლა 15 წუთით იბლოკება. შესვლის კოდები დაშიფრულად ინახება, 10 წუთში უქმდება და რამდენიმე არასწორი ცდის შემდეგ იბლოკება.
• ყოველი კლინიკის ჩანაწერები ცალკე მონაცემთა ბაზაში ინახება. ერთი კლინიკა ვერასოდეს ხედავს მეორე კლინიკის შიდა ინფორმაციას — ფასებს, მარაგს, თანამშრომლებს, ექიმის შიდა შენიშვნებს.
• კლინიკის თანამშრომლები ხედავენ მხოლოდ იმას, რის ნახვის უფლებაც მათ როლს აქვს.
• თქვენ მიერ დამატებული ცხოველი კლინიკებისთვის უხილავია: მას ვერ იპოვიან ვერც ტელეფონის ნომრით, ვერც მიკროჩიპით, ვერც QR ბარათით, სანამ თავად არ გაუზიარებთ.
• სარეზერვო ასლები დაშიფრულად ინახება სხვა სერვერზე, რათა მონაცემები არ დაიკარგოს.
• შეცდომების აღრიცხვისას ვინახავთ მხოლოდ ანგარიშის ნომერს — არა სახელს, ტელეფონს ან სამედიცინო ინფორმაციას.

4. Canguru-ს კლინიკებთან გაზიარება — მხოლოდ თქვენი თანხმობით

Canguru-ს ერთ-ერთი მთავარი დანიშნულებაა, რომ თქვენი ცხოველის ისტორია კლინიკიდან კლინიკაში გადაჰყვეს. ეს ხდება მხოლოდ მაშინ, როცა თქვენ ამას დაუშვებთ. აპლიკაციის გამოყენებით და გაზიარების ჩართვით თანხმობას აცხადებთ, რომ თქვენ მიერ არჩეული მონაცემები გადაეცეს თქვენ მიერ არჩეულ Canguru-ს კლინიკებს:

• კონკრეტულ კლინიკასთან: აპლიკაციაში ჩართავთ „შეუძლია ნახოს ჩემი მონაცემები და ცხოველები“.
• კლინიკის მოთხოვნით: მიმღებში თანამშრომელს შეუძლია წვდომა გთხოვოთ — აპლიკაციაში გამოჩნდება „დაშვება“ ან „უარყოფა“; სანამ არ დაუშვებთ, კლინიკა არაფერს ხედავს.
• ყველა Canguru-ს კლინიკასთან: თუ ჩართავთ „ნებისმიერ Canguru-ს კლინიკას შეუძლია ჩემი მოძებნა ტელეფონის ნომრით“, ახალი კლინიკა მიმღებში გიპოვით. ეს ნაგულისხმევად გამორთულია.
• თითოეული ცხოველისთვის ცალკე: „ამ ცხოველის ისტორიის გაზიარება ჩემს სხვა კლინიკებთან“.

თანხმობით კლინიკა ხედავს: თქვენს საკონტაქტო მონაცემებს, თქვენს ცხოველებს, თქვენ მიერ მითითებულ ალერგიებს და — იმ ცხოველებზე, რომელთა ისტორიასაც აზიარებთ — რაც სხვა კლინიკებმა გამოაქვეყნეს. კლინიკა ვერასოდეს ხედავს სხვა კლინიკის ფასებს, ანგარიშებს ან შიდა შენიშვნებს.

თანხმობის გაუქმება შეგიძლიათ ნებისმიერ დროს, ერთი შეხებით. ამის შემდეგ კლინიკა ვეღარ ნახავს თქვენს ახალ ცვლილებებს და სხვა კლინიკების ჩანაწერებს. რაც კლინიკამ თავად ჩაიწერა თქვენი ვიზიტების დროს, მისი სამედიცინო დოკუმენტაციაა და კანონის შესაბამისად მასთან რჩება.

ყოველი თანხმობა და მისი გაუქმება ინახება თარიღითა და კლინიკის მითითებით — ასე ყოველთვის ჩანს, ვის რისი ნახვის უფლება ჰქონდა და როდის.

5. კლინიკის ჩანაწერების მოძიება — „ეს თქვენ ხართ?“

თუ კლინიკას უკვე ჰყავხართ კლიენტად, აპლიკაცია მის ჩანაწერებს მხოლოდ მას შემდეგ შემოგთავაზებთ, რაც SMS კოდით დაადასტურებთ, რომ ეს ნომერი თქვენია. დადასტურებამდე ვაჩვენებთ მხოლოდ კლინიკის სახელს და ცხოველების სახელებს. ჩანაწერები თქვენს ანგარიშს მხოლოდ თქვენი „დიახ, ეს მე ვარ“-ის შემდეგ უკავშირდება; „არა“-ს შემთხვევაში არაფერი იცვლება. „დიახ“ ამ ჩანაწერების მქონე კლინიკებს — რომლებისთვისაც უკვე კლიენტი ხართ — საშუალებას აძლევს, ნახონ აპლიკაციაში თქვენ მიერ შეტანილი ცვლილებები; ეს თითოეულისთვის ცალკე შეგიძლიათ გამორთოთ.

თქვენ მიერ შეყვანილი ინფორმაცია „დაუდასტურებლად“ ითვლება, სანამ კლინიკის თანამშრომელი არ დაადასტურებს. თქვენი ცვლილება კლინიკის დადასტურებულ ჩანაწერს ავტომატურად არ ცვლის — ის კლინიკის დადასტურებას ელოდება.

6. ვინ ამუშავებს მონაცემებს ჩვენი სახელით

მხოლოდ მომსახურების მიმწოდებლები, რომელთა გარეშეც სერვისი ვერ იმუშავებს, და მხოლოდ იმ მოცულობით, რაც მათ ამოცანას სჭირდება:

• SMS-ის გაგზავნა — sender.ge (ტელეფონის ნომერი და შეტყობინების ტექსტი).
• ელფოსტის გაგზავნა — canguru.ge-ს საფოსტო სერვერი.
• სერვერი, სადაც მონაცემები ინახება, და სარეზერვო ასლების სერვერი.
• Google და Apple — მხოლოდ მაშინ, როცა მათი საშუალებით შედიხართ.

მონაცემებს არ ვყიდით და რეკლამისთვის არავის ვაძლევთ. სახელმწიფო ორგანოს მონაცემებს გადავცემთ მხოლოდ კანონით გათვალისწინებულ შემთხვევაში.

7. ქუქი

ვიყენებთ მხოლოდ ერთ აუცილებელ ქუქის, რომელიც ანგარიშში შესულს გტოვებთ. თვალთვალის, ანალიტიკის ან სარეკლამო ქუქი არ გვაქვს.

8. შენახვის ვადა

თქვენს მონაცემებს ვინახავთ, სანამ ანგარიში გაქვთ. ანგარიშის წაშლა აპლიკაციიდან ნებისმიერ დროს შეგიძლიათ: იშლება ანგარიში, შესვლის გზები, თანხმობები, შეტყობინებები და მხოლოდ თქვენ მიერ დამატებული ცხოველები. სარეზერვო ასლებიდან მონაცემები 60 დღეში ქრება.

კლინიკის ჩანაწერები კლინიკის სამედიცინო დოკუმენტაციაა — ანგარიშის წაშლისას ისინი თქვენი ანგარიშიდან იხსნება, მაგრამ კლინიკასთან რჩება.

9. თქვენი უფლებები

„პერსონალურ მონაცემთა დაცვის შესახებ“ საქართველოს კანონის შესაბამისად გაქვთ უფლება:

• მიიღოთ ინფორმაცია და ასლი იმ მონაცემებისა, რომლებსაც ვამუშავებთ;
• შეასწოროთ არასწორი მონაცემები;
• წაშალოთ მონაცემები და ანგარიში;
• ნებისმიერ დროს გააუქმოთ თანხმობა;
• მიმართოთ საქართველოს პერსონალურ მონაცემთა დაცვის სამსახურს.

მონაცემების უმეტესობას თავად შეცვლით ან წაშლით აპლიკაციაში. დანარჩენისთვის მოგვწერეთ info@canguru.ge-ზე — გიპასუხებთ 10 სამუშაო დღეში.

10. არასრულწლოვნები

Canguru-ს ანგარიში 18 წელს გადაცილებული პირისთვისაა. არასრულწლოვნის ცხოველს არეგისტრირებს მშობელი ან მეურვე.

11. ცვლილებები და კონტაქტი

მნიშვნელოვან ცვლილებებს აპლიკაციაში წინასწარ გაცნობებთ. თუ ცვლილება თქვენი მონაცემების გაზიარებას ეხება, ახალ თანხმობას გთხოვთ.

კითხვები, მოთხოვნები და საჩივრები: info@canguru.ge.